بھارت کے انتہا پسند وزیر اعظم نریندر مودی نے چناؤ جیتنے کیلئے سرجیکل اسٹرائیک کا چورن بیچنا شروع کردیا۔ چھتس گڑھ میں انتخابی ریلی کے سامنے بڑھک مارتے ہوئے نریندر مودی نے کہا کہ "ایک ووٹ" سے پاکستان کیخلاف سرجیکل اسٹرائیک اور فضائی کارروائی ممکن ہوئی۔ مودی نے کہا کہ سرحد پار حملہ اور خلا میں سیٹلائٹ کو مار گرانے کی طاقت عوام کے ووٹ کی ہے۔

واضح رہے کہ اپوزیشن جماعتوں کا کہنا ہے کہ بھارتی وزیر اعظم نریندر مودی ہر صورت الیکشن جیتنا چاہتا ہے اور اس سلسلے میں وہ انڈین فوج کا کندھا استعمال کر رہا ہے۔ دو ہفتے قبل مودی نے ریاست مہاراشتر میں ایک ریلی کے دوران خطاب کرتے ہوئے ووٹروں سے کہا تھا کہ وہ اپنا ووٹ بالاکوٹ میں حملہ کرنے والوں کے نام کریں۔ بھارتی اخبار ٹائمز آف انڈیا کے مطابق الیکشن کمیشن نے مودی کی جانب سے انتخابی مہم میں فوج کو گھسیٹنے پر ریاست مہاراشتر میں حکام سے رپورٹ طلب کر رکھی ہے۔

بھارتیوں کو اپنے بلند و بانگ دعوؤں اور نعروں سے بے وقوف بنانے والے نریندر مودی نے منگل کے روز چھتس گڑھ میں خطاب کرتے ہوئے کہا کہ کانگریس کے سربراہ راہول گاندھی کا مائنڈ سیٹ سلطنت والا ہے اور وہ ہمیں غلام بناکر رکھنا چاہتے ہیں۔ مودی نے کہا کہ کانگریس والے اسے چور کہتے ہیں، جبکہ وہ دیش کا چوکیدار ہے۔