فلوریڈا: امریکہ کی ریاست الینوائے میں اندھا دھند فائرنگ کرکے 3 افراد کو قتل کرنے والا یو ایس ملٹری کا حاضر سروس فوجی نکلا۔ پولیس نے جائے وقوعہ سے 37 سالہ ڈیوک ویب کو اسلحہ سمیت گرفتار کرلیا۔ پولیس کا کہنا ہے کہ جب وہ موقع پر پہنچے تو فوجی اہلکار اپنا اسلحہ چھپا رہا تھا۔

امریکی جریدے این بی سی شکاگو کے مطابق حاضر سروس فوجی ڈیوک ویب کا تعلق فلوریڈا سے ہے۔ اس نے الینوائے کے علاقے روک فورڈ میں ایسٹ اسٹیٹ اسٹریٹ میں ایک فوڈ ریسٹورنٹ کے باہر فائرنگ کی۔ فائرنگ کرتے وہ ریسٹورنٹ میں بھی داخل ہوا، جس سے 3 افراد ہلاک اور 3 زخمی ہوئے ہیں۔

میڈیا رپورٹس میں بتایا گیا ہے کہ 37 سالہ ڈیوک ویب کے پاس دو پستول تھیں۔ ملزم اب پولیس کی تحویل میں ہے اور اس پر تین افراد کے قتل کی دفعات لگائی ہیں۔ تحقیقاتی ادارے اب تک یہ پتا نہیں لگا سکے ہیں کہ اس نے فائرنگ کیوں کی۔

فائرنگ کے واقعے میں ہلاک ہونے والوں میں دو نو عمر بھی شامل ہیں۔ زخمیوں میں سے ایک کی حالت نازک بتائی جارہی ہے۔ تاہم یہ واضح نہیں کہ ہلاک اور زخمی ہونے والوں کا زیر حراست ملزم سے کیا تعلق تھا۔