کراچی: پاکستانی نژاد برطانوی گلوکار ہارون راشد نے ’’بلیک لائیوز میٹر‘‘ کی تحریک سے متاثر ہو کر نیا گانا لانچ کر دیا ہے۔ جسے اب تک ویڈیو شیئرنگ ویب سائٹ یوٹیوب پر لاکھوں لوگ دیکھ چکے ہیں۔

ماضی کے معروف پاکستانی بینڈ ’’آواز‘‘ کا حصہ رہنے والے گلوکار ہارون نے اپنے گانے Just Let Me Breathe میں نسلی عدم مساوات کے پہلوؤں کو اجاگر کیا ہے۔

واضح رہے کہ امریکہ میں اکثر پولیس کے ہاتھوں سیاہ فام افراد کی ہلاکت کے واقعات سامنے آتے رہتے ہیں اور اس کیخلاف وہاں احتجاج بھی کیا جاتا ہے۔

اس حوالے سے سیاہ فام شخص جارج فلوئیڈ کے قتل کی ویڈیو دنیا بھر میں وائرل ہوئی تھی جس میں پولیس اہلکار نے اپنے گھٹنے سے اس کی گردن کو دبوچ رکھا تھا اور وہ گُھٹی گُھٹی آواز میں ’’مجھے سانس نہیں آرہی‘‘ کہہ رہا تھا۔