چین اپنی کورونا ویکسین شمالی کوریا کو دے چکا۔ امریکی تھنک ٹینک

china apni corona vaccine north korea ko de chuka us think tank

واضح رہے
دسمبر 2, 2020
1:08 صبح

چین کورونا وائرس کے انسداد کیلئے موثر دوا تقریباً دو ماہ پہلے ہی تیار کر چکا ہے، تاہم عالمی ادارے اور امریکہ اسے تسلیم کرنے کو تیار نہیں

واشنگٹن: شمالی کوریا کے حوالے سے قائم امریکی تھنک ٹینک نے انکشاف کیا ہے کہ چین نے شمالی کوریا کے سربراہ کم جونگ اُن اور ان کے خاندان کے افراد کو کورونا سے بچاؤ کی ویکسین فراہم کی ہے۔ تھنک ٹینک کے رکن ہیری کازیان نے یہ دعویٰ جاپان کے انٹیلی جنس ذرائع کی رپورٹس کی بنیاد پر کیا ہے۔

اپنے آرٹیکل میں ہیری کازیان کا کہنا ہے کہ چین نے شمالی کوریا کے سربراہ کم جونگ اُن، ان کے خاندان اور دیگر اعلیٰ قیادت کو کورونا سے بچاؤ کی تجرباتی ویکسین فراہم کی ہے۔ تھنک ٹینک کے رکن نے دعویٰ کیا کہ چینی حکومت کی جانب سے گزشتہ 2 سے 3 ہفتوں کے درمیان شمالی کوریا کی اعلیٰ قیادت کو ویکسین مہیا کی گئی ہے۔

تاہم امریکی تھنک ٹینک کے رکن کے دعوے کی تصدیق نہیں ہوسکی ہے اور نہ ہی یہ بات سامنے آئی ہے کہ کس چینی دواساز کمپنی کی ویکسین فراہم کی گئی۔

دوسری جانب چینی وزرات خارجہ کی ترجمان ہوا چن ینگ نے ان رپورٹس پر کسی بھی قسم کے تبصرے سے گریز کیا اور کہا کہ انہوں نے اس حوالے سے کچھ بھی نہیں سنا۔

واضح رہے کہ شمالی کوریا کی جانب سے اب تک ملک میں کورونا وائرس کے کسی کیس کی تصدیق نہیں کی گئی تاہم جنوبی کوریا کی نیشنل انٹیلی جنس سروس نے پڑوسی ملک میں کورونا نہ پھیلنے کے امکان کو مسترد کیا ہے۔

واضح رہے

اردو زبان کی قابل اعتماد ویب سائٹ ’’واضح رہے‘‘ سنسنی پھیلانے کے بجائے پکّی خبر دینے کے فلسفے پر قائم کی گئی ہے۔ ویب سائٹ پر قومی اور بین الاقوامی حالات حاضرہ عوامی دلچسپی کے پہلو کو مدنظر رکھتے ہوئے پیش کئے جاتے ہیں۔