ٹی ٹوئنٹی ورلڈ کپ 2021ء کے سنسنی خیز مقابلے متحدہ عرب امارات کی سرزمین میں جاری ہیں۔ میگا ایونٹ کا کوالیفائنگ راؤنڈ عمان میں کھیلا گیا، جہاں دوسرے ہی میچ میں اسکاٹ لینڈ نے بنگلہ دیش کو ہرا کر اپ سیٹ کیا۔

17 اکتوبر کو کھیلے گئے میچ میں اسکاٹ لینڈ نے بنگلہ دیش کو 6 رنز سے مات دی۔ عمان کے الامارات کرکٹ اسٹیڈیم میں اسکاٹ لینڈ نے 9 وکٹوں کے نقصان پر مقررہ 20 اوورز میں 140 رنز بنائے۔ جس کے جواب میں بنگلہ دیشی ٹیم 134 رنز بنا سکی۔

اس مقابلے کے بعد ٹی ٹوئنٹی ورلڈ کپ کی 14 سالہ تاریخ میں ہونے والے اپ سیٹس کی تعداد 7 ہوگئی۔ ان میں 3 بنگلہ دیش، 2 انگلینڈ اور ایک، ایک آسٹریلیا اور ویسٹ انڈیز کے خلاف ہوئے ہیں۔ بنگال ٹائیگرز کو ہانگ کانگ، آئرلینڈ اور اب اسکاٹ لینڈ جیسی ٹیم نے گھاس کھلائی۔

ٹی ٹوئنٹی ورلڈ کپ میں پہلا اپ سیٹ افتتاحی ایونٹ یعنی 2007ء میں اس وقت ہوا جب زمبابوے نے آسٹریلیا کو 5 وکٹ سے شکست دی۔ یہ ورلڈ کپ کا چوتھا میچ تھا، جس میں آسٹریلیا نے 9 وکٹوں پر 138 رنز بنائے تھے۔

جواب میں برینڈن ٹیلر کی شاندار 60 رنز کی ناٹ آؤٹ اننگز کی بدولت زمبابوے نے ہدف آخری اوور کی چوتھی گیند پر حاصل کرکے تاریخ رقم کر دی تھی۔ اس مقابلے کو ٹی 20 ورلڈ کپ کا سب سے زیادہ چونکا دینے والا اپ سیٹ بھی کہا جاتا ہے۔

رپورٹ کے مطابق ٹی ٹوئنٹی ورلڈ کپس میں نیدرلینڈز نے دو بار انگلینڈ کے چھکے چھڑائے۔ دونوں ٹیموں کے درمیان 2009ء کے ورلڈ کپ میں لارڈز کے تاریخی گراؤنڈ میں جو میچ کھیلا گیا، وہ نیدرلینڈز کی ٹیم نے حیرت انگیز طور پر 4 وکٹ سے جیت لیا تھا۔ میزبان انگلینڈ نے نیدرلینڈز کو 5 وکٹ گنواکر 162 رنز کا ہدف دیا، جو ایک سنسنی خیز مقابلے کے بعد غیر تجربہ کار ڈچ سائیڈ نے آخری گیند پر حاصل کیا۔

اس کے برعکس 2014ء میں جب یہ دونوں ٹیمیں آمنے سامنے آئیں تو نیدرلینڈز نے انگلینڈ کو بآسانی 45 رنز سے شکست دے دی۔ اس بار نیدرلینڈ نے پہلے بیٹنگ کرتے ہوئے 5 وکٹ پر 133بنائے۔ جس کے جواب میں انگلینڈ کی ٹیم 88 رنز پر ڈھیر ہوگئی تھی۔

اسی ورلڈ کپ میں ہانگ کانگ نے بنگلہ دیش کو دھول چٹا دی تھی۔ 10ویں میچ میں ہانگ کانگ نے ٹاس جیت کر بنگلہ دیش کو بیٹنگ کی دعوت دی تھی۔ یہ حکمت عملی انتہائی کامیاب رہی اور بنگال ٹائیگرز 17 اوورز میں صرف 108 رنز بنا کر آؤٹ ہوگئے۔

ہدف کے تعاقب میں ہانگ کانگ کی غیر تجربہ کار ٹیم کو بھی پریشانی کا سامنا کرنا پڑا۔ تاہم اس نے 8 وکٹ کے نقصان پر ہدف حاصل کرکے ورلڈ کپس میں اپنی پہلی کامیابی رجسٹر کرائی۔

اس سے قبل 2009ء کے ورلڈ کپ میں بنگلہ دیش کو آئرلینڈ کے ہاتھوں بھی ہزیمت اٹھانا پڑی تھی۔ بنگلہ دیش نے پہلے بیٹنگ کرتے ہوئے 8 وکٹ کے نقصان پر 137 رنز بنائے تھے۔ یہ ہدف آئرلینڈ نے بڑے اعتماد سے 19 ویں اوور میں محض 4 وکٹ گنواکر عبور کرلیا تھا۔

دوسری جانب 2016ء میں افغانستان نے ورلڈ چیمپئن ٹیم ویسٹ انڈیز کو شکست دے کر اپ سیٹ کیا۔ اس میچ میں ویسٹ انڈیز کو جیت کیلئے 123 رنز درکار تھے۔ لیکن کیربین کھلاڑی افغان بالنگ اٹیک کے خلاف 117 رنز ہی بنا پائے۔ اس طرح افغانستان نے ورلڈ کپس میں پہلی بار کسی بڑی ٹیم کے خلاف کامیابی حاصل کی۔

اب دیکھنا یہ ہے کہ امارات میں جاری ورلڈ کپ میں مزید اپ سیٹ ہوسکتے ہیں یا نہیں، کیونکہ سُپر 12 مرحلے کیلئے کوالیفائی کرنے والی اسکاٹ لینڈ اور نیمیبیا سمیت افغانستان کی اسپن ہیوی ٹیم خطرناک دکھائی دے رہی ہے۔