تازہ ترین

قومی ٹیم نے نیوزی لینڈ میں شکست سے کھاتہ کھول لیا

qomi team ne nz main shikasht se khaat khol liya
  • واضح رہے
  • دسمبر 18, 2020
  • 5:41 شام

پہلے ٹی ٹوئنٹی میں 5 وکٹ سے ناکام۔ نصف ٹیم 50 کے مجموعی اسکور پر ہی پویلین لوٹ گئی تھی

آکلینڈ: پاکستان نے پہلے ٹی ٹوئنٹی میچ میں نیوزی لینڈ کو جیت کے لیے 154 رنز کا ہدف دیا جو نیوزی لینڈ نے 19ویں اوور میں 5 وکٹ کے نقصان پر پورا کرلیا۔

آکلینڈ میں قومی ٹیم کے قائم مقام کپتان شاداب خان نے ٹاس جیت کر پہلے بیٹنگ کرنے کا فیصلہ کیا۔ لیکن بابراعظم کی غیر موجودگی میں پاکستان کا ٹاپ آرڈر مکمل طور پر ناکام ثابت ہوا۔ شاداب خان 42 اور فہیم اشرف 31 رنز کے ساتھ ٹاپ اسکورر رہے۔

عبداللہ شفیق اور محمد رضوان نے اننگز کا آغاز کیا، عبداللہ کھاتہ کھولے بغیر ہی پویلین واپس لوٹ گئے اور محمد رضوان 17 رنز بنانے کے بعد آؤٹ ہوئے، تجربہ کار بلے باز محمد حفیظ نے بھی کھاتہ کھولنے کی زحمت نہیں کی جب کہ حیدر علی بھی صرف 3 رنز کے مہمان ثابت ہوئے۔

خوشدل شاہ نے کپتان شاداب خان کا ساتھ دیتے ہوئے اسکور بورڈ کو آگے بڑھایا مگر خوشدل شاہ بھی 16 رنز پر ہمت ہار گئے۔ 39 رنز پر آدھی ٹیم کے پویلین واپس لوٹ جانے سے ایسا دکھائی دے رہا تھا پاکستان بمشکل 100 رنز بناسکے گا لیکن کپتان شاداب خان نے ذمہ داری کا مظاہرہ کرتے ہوئے پہلے عماد اور پھر فہیم اشرف کے ساتھ اچھی شراکت قائم کی۔
عماد وسیم 19 اور وہاب ریاض 9 رنز بنانے کے بعد آؤٹ ہوئے، کپتان شاداب خان 42 رنز کی شاندار اننگز کھیل کر پویلین واپس لوٹے جب کہ فہیم اشرف نے 17 گیندوں پر 31 رنز کی جارحانہ اننگز کھیلی۔

نیوزی لینڈ کی جانب سے ڈیبیو کرنے والے جیکب ڈفی نے 4، اسکاٹ کوگلین نے 3 وکٹیں حاصل کیں جب کہ ایک وکٹ آئش سودی کے حصے میں آئی۔

ہدف کے تعاقب میں نیوزی لینڈ کے مارٹن گپٹل اور وکٹ کیپر بیٹسمین ٹم سیفرٹ نے اننگز کا آغاز کیا، گپٹل 6 رنز بنانے کے بعد شاہین آفریدی کا شکار بن گئے جس کے بعد ڈیون کونوے بیٹنگ کیلیے آئے لیکن حارث رؤف نے انہیں بھی 5 رنز پر پویلین واپس بھیج دیا۔

گلین فلپس اور ٹم سیفرٹ کے درمیان اچھی شراکت قائم ہوئی، فلپس 23 رنز بنانے کے بعد آؤٹ ہوئے تاہم سیفرٹ کریز پر ڈٹے رہے اور مارک چیپمین کیساتھ ایک اور اچھی شراکت قائم کرکے ٹیم کی فتح میں اہم کردار ادا کیا۔

چیپمین 34 رنز بنانے کے بعد آؤٹ ہوئے جب کہ سیفرٹ نے شاندار نصف سنچری اسکور کی، وہ 57 رنز بناکر پویلین واپس لوٹے۔ قومی ٹیم کی جانب سے حارث رؤف نے 3 اور شاہین آفریدی نے 2 وکٹیں حاصل کیں۔

واضح رہے

اردو زبان کی قابل اعتماد ویب سائٹ ’’واضح رہے‘‘ سنسنی پھیلانے کے بجائے پکّی خبر دینے کے فلسفے پر قائم کی گئی ہے۔ ویب سائٹ پر قومی اور بین الاقوامی حالات حاضرہ عوامی دلچسپی کے پہلو کو مدنظر رکھتے ہوئے پیش کئے جاتے ہیں۔

واضح رہے