دورئہ انگلینڈ کے دوسرے ٹور میچ میں پاکستان نے کاؤنٹی ٹیم نارتھ ہیمپشائر کو بآسانی 8 وکٹ سے شکست دے دی۔ جوشوا کوب کے ناقابل شکست 146 رنز بھی ان کی ٹیم کے کام نہ آئے۔ پاکستان نے فخر زمان کی برق رفتار سنچری کی بدولت انگلش کاؤنٹی ٹیم کا274 رنز کا ہدف محض 41ویں اوور میں حاصل کیا۔

نارتھ ہیمپشائر کے کپتان نے پاکستان کیخلاف ٹاس جیت کر پہلے بیٹنگ کا فیصلہ کیا۔ یہ فیصلہ ان کی ٹیم کیلئے کچھ اچھا ثابت نہ ہوا اور محمد عامر نے پہلی ہی گیند پر اوپنر لیوی کو آؤٹ کردیا۔ اس کے بعد 48 کے مجموعے پر دوسری وکٹ گری۔ جوشوا کوب کے سوا انگلش کاؤنٹی ٹیم کا کوئی بھی بیٹسمین بڑی اننگ کھیلنے میں ناکام رہا۔ جوشوا کوب نے پاکستان کیخلاف اپنے لسٹ اے کیریئر کی سب سے بہترین اننگ کھیلی۔ وہ 146 رنز بناکر بھی ناٹ آؤٹ رہے اور اپنی ٹیم کو ایک معقول ٹوٹل فراہم کیا۔ یوں نارتھ ہیمپشائر نے 50اوورز میں 6 وکٹ کے نقصان پر 273 رنز بنائے۔

پاکستان کی طرف سے محمد عامر، محمد حسنین، عماد وسیم، جنید خان، یاسر شاہ اور حارث سہیل نے ایک، ایک وکٹ حاصل کی۔ نوجوان فاسٹ بالر محمد حسنین کو دورئہ انگلینڈ میں پہلا میچ کھلایا گیا اور انہیں بڑی احتیاط سے استعمال کیا گیا۔ حسنین نے پریکٹس میچ میں 7 اوورز کرائے اور 30 رنز دیئے۔

نارتھ ہیمپشائر کے ہدف کے تعاقب میں پاکستانی اوپنرز نے پُر اعتماد انداز میں بیٹنگ کی اور پہلی وکٹ کی شراکت میں 157 رنز بنائے۔ اس دوران فخر زمان نے ایک چھکے اور 15 چوکوں کی مدد سے 81 گیندوں پر سنچری اسکور کی۔ وہ 101 رنز بناکر آؤٹ ہوئے۔ ان کے بعد امام الحق بھی 71 رنز پر کلین بولڈ ہوکر پویلین لوٹ گئے۔ جبکہ بابر اعظم اور سرفراز احمد نے ذمہ دارانہ بیٹنگ کرتے ہوئے ٹیم کو فتح سے ہمکنار کیا۔ بابر نے 53 گیندوں پر 68 اور سرفراز احمد نے 30 رنز بنائے۔