پاکستان اور انگلینڈ کے درمیان واحد ٹی 20 میچ کل کھیلا جائے گا، جس کیلئے قومی ٹیم نے کارڈف میں سخت ٹریننگ کی۔ کھلاڑیوں کو شدید سردی میں دو گھنٹے تک بیٹنگ، بالنگ اور فیلڈنگ کی پریکٹس کرائی گئی۔ ذرائع کا کہنا ہے کہ انگلینڈ کیخلاف سیریز کے واحد ٹی 20 میچ کیلئے حتمی الیون کا انتخاب کرلیا گیا ہے۔ میچ اتوار کو پاکستانی وقت کے مطابق ساڑھے 6 بجے شروع ہوگا۔ محمد حفیظ فٹنس مسائل کے باعث انگلینڈ کیخلاف ٹی 20 اور ابتدائی دو ون ڈیز نہیں کھیلیں گے۔

واضح رہے کہ گرین شرٹس نے دورئہ انگلینڈ کا فاتحانہ آغاز کرتے ہوئے پہلے ٹور میچ میں کاؤنٹی ٹیم کینٹ کو 100 رنز سے ہرا دیا تھا۔ نوجوان آل راؤنڈر عماد وسیم کے ناقابل شکست 117 رنز کی بدولت پاکستان نے 358 بنائے تھے، جس کے تعاقب میں کینٹ کی ٹیم 258 رنز پر آؤٹ ہوگئی تھی۔ اسی طرح دوسرے پریکٹس میچ میں سرفراز الیون نے کاؤنٹی ٹیم نارتھ ہیمپشائر کو بآسانی 8 وکٹ سے شکست دی تھی۔

آخری پریکٹس میچ ٹی 20 طرز پر کھیلا گیا تھا، جس میں پاکستانی ٹیم نے لیسسٹر شائر کو آؤٹ کلاس کر دیا۔ کاؤنٹی ٹیم کیخلاف یکم مئی کو کھیلے گئے میچ میں پاکستان نے مقررہ 20 اوورز میں 200 رنز بنائے تھے، جبکہ نوجوان بیٹسمین بابر اعظم نے 63 گیندوں پر شاندار سنچری اسکور کی تھی۔ 201 رنز کے ہدف کے تعاقب میں لیسسٹرشائر کی ٹیم آخری اوور میں 142 رنز پر ڈھیر ہوگئی تھی۔ جبکہ اس کے 7 بیٹسمین ڈبل فیگر میں بھی داخل نہیں ہوسکے تھے۔

آئی سی سی ورلڈ کپ سے قبل پاکستان اور فیورٹ انگلینڈ کے درمیان 5 ون ڈے میچوں پر مشتمل سیریز 8 مئی سے شروع ہوگی۔ پہلا میچ 8، دوسرا 11، تیسرا 14، چوتھا میچ 17 جبکہ پانچواں اور آخری میچ 19 مئی کو کھیلا جائے گا۔