پی ٹی آئی حکومت میں میرٹ کی دھجیاں اڑائی جانے لگیں۔ وزیر مملکت برائے موسمیاتی تبدیلی زرتاج گل کی بہن شبنم گل کو قومی ادارہ برائے انسداد دہشت گردی (نیکٹا) کا ڈائریکٹر مقرر کر دیا گیا۔ ذرائع ابلاغ نے انکشاف کیا ہے کہ زرتاج گل نے اپنے اختیارات کا ناجائز فائدہ اٹھاتے ہوئے اسسٹنٹ پروفیسر شبنم گل کے تقرر کی سفارش کی تھی۔

زرتاج گل وزیر کی بہن شبنم گل لاہور کالج برائے خواتین میں گریڈ 18 کی اسسٹنٹ پروفیسر ہیں تاہم کالج کی اسسٹنٹ پروفیسر کو ایک ہی جھٹکے میں انسداد دہشتگردی کے قومی ادارے کا ڈائریکٹر تعینات کر دیا گیا۔

پی ٹی آئی حکومت میں مفادات کا ٹکراؤ کوئی غیر معمولی بات نہیں ہے۔ بلکہ اس سے قبل وزیراعظم کے مشیر برائے صنعت و تجارت عبدالرزاق داؤد کی کمپنی ڈیسکون کو مہمند ڈیم کا ٹھیکا دے دیا گیا تھا۔ اسی طرح عمران خان کے قریبی ساتھی زلفی بخاری جو عوامی نمائندے نہیں، معاون خصوصی وزیر اعظم برائے اوورسیز پاکستانی بنے بیٹھے ہیں۔

ادھر زرتاج گل کی بہن کو نیکٹا کی ڈائریکٹر شپ سے نوازنے کیلئے ہنگامی طور پر نیکٹا کمیٹی کا اجلاس بھی طلب کیا گیا، زرتاج گل نے شبنم گل کو ڈائریکٹر نیکٹا لگوانے کیلئے سیکرٹری داخلہ سے رابطہ کیا، وفاقی سیکرٹری داخلہ اعظم سلیمان سے ٹیلی فونک رابطے کے بعد خط بھی لکھا گیا۔

27 فروری 2019 کو سیکرٹری داخلہ اعظم سلیمان کو لکھا گیا خط موصول ہونے کے بعد نیکٹا کو قانون کے مطابق دیکھنے کو کہا گیا۔ ذرائع وزارت داخلہ کا کہنا تھا کہ ہم نے حکم دیا کہ پالیسی اور قوانین کے مطابق دیکھا جائے جس پر وفاقی وزیر مملکت زرتاج گل نے بتایا کہ ان کی بہن کی ٹیرازم پر پی ایچ ڈی ہیں۔

ذرائع کے مطابق وزارت داخلہ نیکٹا کا کام تھا کہ وہ دیکھتا کیا وہ پی ایچ ڈی ہیں یا نہیں، یہ ان کا اختیار ہے، نیکٹا حکام نے حکومتی خوشنودی حاصل کرنے کیلئے وزیر مملکت کو نواز دیا۔ زرتاج گل کی بہن شبنم گل کی پی ایچ ڈی مکمل نہیں ہوئی۔ شبنم گل لاہور کالج برائے خواتین یونیورسٹی میں اسسٹنٹ پروفیسر تعینات ہے۔

دوسری جانب ترجمان نیکٹا کا کہنا ہے کہ ڈیپوٹیشن پر گریڈ 17 سے گریڈ 19 تک تعیناتی کیلئے وفاقی و صوبائی محکموں سے 12 درخواستیں ملیں، تین رکنی کمیٹی نے انٹرویو کئے۔ اسسٹنٹ ڈائریکٹر، ڈپٹی ڈائریکٹر اور ڈائریکٹر کیلئے موزوں امیدوار شارٹ لسٹ کئے۔ ترجمان نیکٹا نے بتایا کہ شبنم گل منتخب کئے گئے امیدواروں میں سے ایک ہیں۔ کمیٹی نے میرٹ پر ان کی تعیناتی کی سفارش کی، شبنم گل گریڈ 19 میں پہلے ہی سے کام کر رہی تھیں، اس لئے ان کی تقرری بطور ڈائریکٹر خالصتاً میرٹ پر ہوئی۔

ترجمان کے مطابق شبنم گل پی ایچ ڈی اسکالر ہیں اور انسداد دہشت گردی پر کئی مقالے لکھ چکی ہیں، شبنم گل کو نیکٹا کے ریسرچ ونگ کیلئے مناسب اور متعلقہ پایا گیا، نیکٹا نے شبنم گل کی خدمات لینے کیلئے 100 فیصد میرٹ اور مروجہ طریقہ کار کو اختیار کیا۔

اس حوالے سے وزیرمملکت برائے موسمیاتی تبدیلی زرتاج گل نے ہٹ دھرمی کا مظاہرہ کرتے ہوئے کہا کہ ان کی بہن شبنم گل کی نیکٹا میں تعیناتی کسی خصوصی برتاؤ کا نتیجہ نہیں۔ زرتاج گل نے کہا کہ شبنم پی ایچ ڈی اسکالر ہیں اور انسداد دہشت گردی پر کئی مقالے لکھے، وہ گریڈ 19 کی آفیسر، بین الاقوامی تعلقات میں ایم فل کرچکی ہیں، شبنم گل کی نیکٹا میں تعیناتی کیلئے انتخاب کی وجہ انسداد دہشتگردی میں اسپیشلائزیشن ہے۔