تازہ ترین
چوتھے خلیفتہ الرسول ﷺ حضرت علیؓ کا یوم شہادت آج بروز جمعہ نہایت عقیدت اور احترام سے منایا جا رہا ہے۔ تاہم بعض شہروں میں حکومت کی جانب سے گرین سگنل ملنے پر جلوس نکالے گئے۔کراچی میں یوم علیؓ کا مرکزی جلوس نشتر پارک سے برآمد ہوگیا۔ پولیس نے یوم حضرت علی کے موقع پر مرکزی جلوس کی سیکورٹی کے لیے راستوں کو کنٹینرز اور ٹینکرز کی مدد سے سیل کر دیا۔ یہ تمام کارروائی راتوں رات کی گئی۔ ڈسٹرکٹ ایسٹ اور ساؤتھ میں جلوس کی سیکیورٹی کے لیے 2 ہزار سے زائد پولیس افسران و اہلکاروں کو تعینات کیا گیا ہے جبکہ رینجرز کی نفری اس کے علاوہ تعینات ہے۔
واضح رہے کراچی پولیس کی جانب سے جمعرات کی شب یوم حضرت علیؓ کے مرکزی جلوس کی سیکیورٹی کے لیے ایم اے جناح روڈ ، پریڈی اسٹریٹ، تبت سینٹر ، نمائش چورنگی ، تین ہٹی اور کھارادر سمیت ملحقہ سڑکوں اور گلیوں کو کنٹینرز ، ٹینکرز اور قناعتیں لگا کر سیل کر دیا۔
یوم حضرت علی کے حوالے سے جمعے کی صبح 7 بجے نشتر پارک میں مرکزی مجلس ہوئی جبکہ مرکزی جلوس 8 بجے پاک حیدری اور بوتراب اسکاؤٹس کے حصار میں نشتر پارک سے برآمد ہوا جو اپنے روایتی راستوں سے گزرتے ہوئے کھارادر میں حسینیہ ایرانیاں امام بارگاہ پہنچ کر اختتام پذیر ہوگا۔
پنجاب حکومت نے حضرت علی کرم اللہ وجہہ کے یوم شہادت کے موقع پر ہر قسم کے جلوس پر پابندی عائد کردی تھی تاہم رات کے آخری پہر نیا حکم نامہ جاری کیا جس کے بعد جلوس نکالنے کی مشروط اجازت دے دی گئی۔ مرکزی جلوس صبح سویرے مبارک حویلی سے برآمد ہوا جو شام 7 بجے کربلا گامے شاہ میں اختتام پذیر ہوگا۔ اس موقع پر پولیس نے سیکورٹی کے انتظامات کیے ہیں، 7 ہزار اہلکار سیکورٹی ڈیوٹی پر مامور کیے گئے ہیں اور جلوس کے راستوں میں سادہ لباس اہلکار بھی موجود ہیں۔
یوم شہادت حضرت علیؓ کے موقع پر پنجاب میں امام بارگاہوں اور گھروں میں مجالس کی اجازت دے گئی۔ ایس او پیز کے مطابق مجالس زیادہ سے زیادہ ایک گھنٹہ تک جاری رکھی جا سکیں گی۔ ادھر ملتان میں یوم شہادت کے موقع پر ملتان کینٹ سے برآمد ہونے والا جلوس کاشانہ حیدر چاہ بوہڑ والہ سے صبح 7 بجے برآمد ہو گا جو بومن جی چوک صدر بازار سے ہوتا ہوا امام بار گاہ لعل کرتی میں اختتام پزیر ہو گا۔
کوئٹہ سمیت بلوچستان بھر میں آج یوم شہادت حضرت علیؓ عقیدت و احترام کے ساتھ منایا جارہا ہے، کورونا وائرس کے پھیلاؤ کےخطرات کے پیش نظر بلوچستان شیعہ کانفرنس نے کوئٹہ میں نکالا جانے والا جلوس منسوخ کردیا۔ صدربلوچستان شیعہ کانفرنس داود آغا کا کہنا ہے کہ اس سال یوم شہادت حضرت علیؓ کے موقع پر نکالے جانے والاجلوس منسوخ کردیا ہے اور امام بارگاہوں میں سماجی فاصلوں کا خیال رکھتے ہوئے عزاداری کی جائے گی۔
